La Voz de Asturias  |  Lletres

Espertos y trabayadores de la llingua asturiana van revisar mientres los próximos meses les principales reivindicaciones incluyíes nel Llibru Blancu, a los 15 años de la presentación oficial d'esti documentu de propuestes pa la recuperación y normalización del idioma. Asina lo anunciaron esti martes Carlos Pulgar, Xosé Miguel Suárez y Llucía Menéndez, representantes de la Xunta pola Defensa de la Llingua Asturiana, organización qu'entama esti periodu de revisión y actualización.

Xosé Miguel Suárez esplicó les necesidades de revisión, basándose nos cambios que, en materia de llingua asturiana, tuvieron llugar dende 1996. Asina, nel sistema educativu, señaló qu'hubo una implantación importante, especialmente en secundaria, y que la decisión de crear l'asignatura "yá nun ye del Conseyu Escolar, sinón de los padres", pero señaló la situación de dificultaes en munchos centros, o'l debate sobre la situación d'optatividá de la materia.

Tamién se refirió a la mayor presencia de la llingua asturiana nos medios de comunicación, reflexada na existencia de dellos portales dixitales, una axencia de noticies (Europa Press) o un periódicu. Pero tamién señaló la situación de "precariedá" nos medios públicos, qu'analizarán dellos especialistes.

Pulgar refirióse pela so parte a la situación de los Servicios de Normalización. Creáronse munchos, pues un 60% del territoriu asturianu ta nesti momentu cubiertu, pero recordó que sobreviven nunes condiciones "d'inestabilidá" continues.

Con esti envís van facese cuatro meses redondes, formaes por espertos y trabayadores de dellos sectores vinculaos cola llingua asturiana, pero nes que podrá tomar parte cualquier ciudadanu que lo considere oportuno. Los cuatro temes trataos van ser: 'Enseñanza: de la presencia a la normalización' (participen xosé Antón González Riaño, profesor de Didáctica na Universidá d'Uviéu, Beatri Quirós -presidente de la Xunta de Personal Docente-, Paz Fonticiella -profesora de llingua en secundaria- y Iris Díaz -profesora en primaria-, moderaos por Xosé Candel), el 19 de xineru a les 18.00 hores nel Antiguu Institutu de Xixón; 'Medios de Comunicación na sociedá de la información' (participen los periodistes Naciu Varillas, Ana Vanessa Gutiérrez, Próspero Morán y Cristóbal Ruitiña, moderaos por Rubén Ardura) el 1 de febreru, a les 18.00 hores nel Departamentu de Filoloxía de la Universidá d'Uviéu; 'Hacia la consolidación y espansión de los Servicios de Normalización Llingüística' (participen Penélope Miranda y María Xosé Rodríguez, trabayadores de servicios de normalización, Adolfo Camilo -xestor cultural- y Esteban Intrialgo -abogáu-, moderaos por Mónica Riesgo), el 15 de febreru, a les 18.00 hores nel salón d'actos del Departamentu de Filoloxía Española de la Universidá d'Uviéu; y 'Recuperación y normalización llingüística d'Asturies' (participen Carlos Pulgar -voceru de la Xunta pola Defensa de la Llingua-, Ramón d'Andrés -profesor de Filoloxía Asturiana na Universidá d'Uviéu- y David Guardado -filólogu-), el 29 de febreru, a les 18.00 hores, nel salón d'actos del Departamentu de Filoloxía Española.