La Xunta Directiva de la SGAE alcuéntrase reunida esti xueves p'aprobar la convocatoria d'elecciones xenerales, separar a tolos imputaos de los sos puestos, dexar vacante a la Dirección Xeneral de la sociedá y convocar una Asamblea Xeneral estraordinaria pa setiembre. Nesta xunta tán nomes como'l secretariu xeneral de la entidá, Franciso Galindo, Yolanda García, Mikel Erentxun, Víctor Manuel, Caco Senante, Ignacio Alonso, Inma Serrano y Teo Cardalda.
Espérase que la xunta dure unes dos hores y media y al so términu la SGAE va informar de les decisiones tomaes. Cualquier decisión que se tome na xunta va tener qu'aprobala la mayoría de los sos miembros. La Xunta Directiva ta formada por 38 miembros, que nun tienen por qué asistir y que puen delegar el so votu.
La entidá, qu'anunció la personación na causa xudicial abierta na Audiencia Nacional como parte perxudicada, punxo en marcha una comisión d'investigación y va examinar toles cuentes del grupu.
Amás, na Asamblea Xeneral estraordinaria que s'entame en septiembre escoyeríense los miembros d'una Comisión de Refundación que modifique les normes electorales, "ampliando la base democrática de participación".
Al respecto de la Comisión d'Investigación sobre'l presuntu delitu de financiación illegal, ta en manes de Ramón Lopez Vilas, catedráticu de Derechu Civil, ex maxistráu del Tribunal Supremu y miembru de l'Academia de lexislación y Xurisprudencia. Los sos resultaos van treslladase a tolos socios y a l'Audiencia Nacional, según informa la SGAE.
Coles mesmes, la Comisión Rectora acordó tamién la contratación d'un director económicu financieru del Grupu SGAE con esperiencia na intervención del Estáu coles mires de reexaminar, "tolos procedimientos de control presupuestariu de la entidá".
Esta persona va dirixir "una auditoría d'Arteria con determín de valores de los sos activos" y va presentar un informe "que dexe'l desprendimientu de toos aquellos que nun seyan esenciales pa la so actividá como entidá de xestión".
A lo último, la SGAE fizo un llamáu a la participación nesti procesu de refundación a tolos socios que quieran collaborar y a participar de forma activa "na reconstrucción de la imaxe y reputación de la entidá", asina como a garantizar "un procesu de diálogu abiertu a tolos que quieran contribuyir activamente nel mesmu".
vídeo:
vídeo:
vídeo:
vídeo:
